Duorastat 29.7.2021

• 

• 

• 

Plakáhtagilvvohallama vuoitit leat válljejuvvon! Loga lasi:  

https://koronaturvallinenlappi.fi/julistekilpailu/ (suomagillii)

Sámi (Lappi) koronageahčastat almmustuhttojuvvo jorgalussan okte vahkus.
Buohkat, geat orodit Sámis (Lappis) galget ohcalit destema várás vuollegis šielmmáin, unnánašge infekšuvnna dávdamearkkat ilbmudettiin.

Áigeguovdilis liŋkkat:

Sámi (Lappi) virggálaš rávvagat koronavirusnjoammuma vávji mátkkošteaddjái (dušše suomagillii)

DBL: Mátkkošteapmi ja koronaviruspandemiija (dušše suomagillii)

Lasi rávvagat sihke gustojeaddji ávžžuhusat ja ráddjehusat buohccedikšunbiirriid viidodagain

DBL: COVID-19-boahkuhemiid ovdáneapmi (dušše suomagillii)

Sámi (Lappi) buohccedikšunbiire

(áigedássásaš dieđut d. 15.46)

Sámi buohccedikšunbiire lea epidemiija vuođđodásis.

Guovtti vahku ilbmudanlohku (12.–25.7.) lea 61,6/100 000 orru.
Ovtta vahku ilbmudanlohku (19.–25.7.) lea 35,1/100 000 orru.

Dán oktavuođas ilbmudanlohkui gullet maid dat dáhpáhusat, main olbmo ruovttubáikegoddi lea buohccedikšunbiirre olggobealde. Dan dihte lohku sáhttá spiehkastit DBL statistihkain, main mielde eai lohkkojuvvo olgobáikegotti olbmot.

Litna dávdamearkkainnai galgá ohcaluvvot destii dakkaviđe – maŋemus áiggiid šaddan joavkodávdaluvvamat berošmeahttunvuođa dihte

Ovddit geahčastaga maŋŋel leat gávnnahuvvon 12 ođđa njoammuma. Dain Roavenjárggas gávnnahuvvoje guhtta, main karantenas leat leamaš guokte. Okta njomohalai olgobáikegottis ja earáid álgoboahtimuš lea vel čielggaduvvome. Gihttelis gávnnahuvvoje njeallje njoammuma, main golbma gulle Koivukoti njoammungollosii ja ovtta álgoboahtimuša čielggadeapmi lea gaskan. Posios gávnnahuvvui njoammun olgobáikegotti olbmos ja Muonios gávnnahuvvui njoammun báikegotti olbmos, gii lea leamaš válmmasin karantenas.  

Maŋemus áiggiid leat boahtán ovdan olu dilit, ahte olbmos leat dihtton dávdamearkkat, mat čujuhit koronai, muhto destii ohcaleami sajis leat deivojuvvon eará olbmot. Dáin diliin leat šaddan joavkodávdaluvvamat. Sámi buohccedikšunbiirre infekšuvnnaid duostunovttadat háliida deattuhit, ahte litna dávdamearkkainge ii galgga deaivat eará olbmuid, muhto galgá mannat deasttas ja bissut ruovttus deastabohtosa oažžuma rádjái.

Sámi buohccedikšunbiirre infekšuvnnaid duostunovttadat ávžžuha joavkodáhpáhusaide dego ovdamearkka dihte festiválaide oassálastiid ohcalit koronadestii sulaid jándora ovdal ieš dáhpáhusa. Infekšuvnnaid duostunovttadat geahččá, ahte dákkár geavat lea hui ábas vuohki epidemiija duostumii ja deattuha, ahte dat galggalii leat nuvttá riikkavuložiidda.

Čuovvovaš báikkiin lea sáhttán dávdaluvvat koronanjoammumii

• Roavenjárggas restauráŋŋa Valdemaris bearjadaga 23.7 ja lávvordaga 24.7. gaskasaš ija diibmu 22–02
• Roavenjárggas RoPS–ONS –spábbačiekčanspealus lávvordaga 24.7. diibmu 17–19 (spealu áigge)
• Roavenjárggas Roy Club -idjaklubbas lávvordaga 24.7. diibmu 02–04
• K-Supermarket Gihttelis sotnabeaivve 25.7. diibmu 12–13
• Roavenjárggas Maskus, Askos, Jyskis sihke Iskus mánnodaga 26.7. diibmu 14–16
• Roavenjárggas Pizza & Buffa – restauráŋŋas mánnodaga 26.7. diibmu 16–17 
• Roavenjárggas Veken Kalustes sihke Kaluste Varrios/Kodin Terras mánnodaga 26.7. diibmu 17–18

Roavenjárga boahkuha boahtte vahkuloahpa almmá áigevárrema haga – vuosttaš boahkuhanaddosa sáhttá viežžat gávpotdálus

Dieđáhus. Almmustuhtton: 29.07.2021, 16:30
Roavenjárgga gávpot

Roavenjárgalaččat sáhttet oažžut boahtte vahkuloahpa koronaboahkuheami vuosttaš addosa almmá áigevárrema haga gávpotdálu boahkuhančuoggás.

“Epidemiijadili hedjoneami mielde riikkaviidosaččat jođánit sihke herkket njoammu deltavariánta leavvama caggama várás arvvosnuhttit vel boahkutkeahtes roavenjárgalaččaid viežžat vuosttaš koronaboahkuheami. Háliidit dahkat boahkuheami váldima nu álkin go vejolaš nu ahte mearrideimmet rahpat gávpotdálu boahkuhančuoggá maid vahkulohppii”, muitala Roavenjárgga gávpothoavda Ulla-Kirsikka Vainio.

Boahtte vahkuloahpa vuosttaš boahkuhanaddosa sáhttet viežžat visot 16 jagi deavdán olbmot ja dan boarráseappot.

“Dás jurddahuvvo maid boahtteáigge dáhpáhusaid ollahuvvama ja dorvvolašvuođa. Mađi alit lea boahkuhangokčevašvuohta, dađi buorebut dat dorvvasta servodaga ja dahká vejolažžan servodaga rahpama. Dáinna njuovžilis vejolašvuođain viežžat boahkuheami vahkuloahpa almmá áigevárrema haga sávvat dábuhit earenoamážit nuoraid, geat eai leat vel boahkuhuvvon – almmatge maid buohkaide vuosttaš addosa ohcciide buresboahtin”, dadjá Sámi buohccedikšunbiirre infekšuvdnanjunušdoavttir Markku Broas.

Vainio ja Broas oassálastiba goappašat vahkuloahpa boahkuhemiid ordnemii gávpotdálus.

Beaktoboahkuheami dehege nuppi boahkuhanaddosa váldima várás galgá ain várret áiggi. Áigevárrema bakte sáhttá várret áiggi maid vuosttaš boahkuheapmái.

Gávpotdálu boahkuhančuokkis bálvala lávvordaga 31.7. ja sotnabeaivve 1.8. d. 12–16

• Vuosttaš boahkuheami sáhttet ohcat buohkat 16 jagi deavdán olbmot.
• Váldde boahkuheapmái mielde persovdnagoartta dehe Kela-goartta (álbmotealáhatlágádusa goartta). Ráhkkan báhcit boahkuheami maŋŋel čuovvuma várás 15 minuhttii.
• Vahkuloahpa lea vejolaš oažžut dušše vuosttaš koronaboahkuheami, dutnje várrejuvvo seamma áigi beaktoboahkuheapmái.
• Muittáthan boahkuheapmái boađedettiinnai fuolahit dorvogaskkain, atnit máskka ja doahttalit eará hygieniija- ja dorvvolašvuođa rávvagiid.
• Ithan boađe boahkuheami várás dávdamearkkalažžan.

Lassidiehtu:

Ulla-Kirsikka Vainio, gávpothoavda, ulla-kirsikka.vainio(at)rovaniemi.fi,  t. 040 625 6535
Markku Broas, Sámi buohccedikšunbiirre infekšuvdnanjunušdoavttir, markku.broas(at)lshp.fi, t. 050 347 2387

Sámi buohccedikšunbiirres gávnnahuvvon koronadáhpáhusat vahkkosaččat

Vahkku 28: 32 dáhpáhusa

Vahkku 29: 41 dáhpáhusa

Vahkku 30 (nohkavaš vahkku): 20 dáhpáhusa (29.7. d. 15.46 rádjái)

Buot buohkanassii Sámi buohccedikšunbiirre čájánasváldinčuoggáin dahkkojuvvon deasttaid vuođul leat gávnnahuvvon 945 dáhpáhusa. Lohkui gullet maid olgobáikegotti olbmot.

Infekšuvnnaid duostunovttadat

***

Oarjebađaeatnama buohccedikšunbiire

(áigedássásaš dieđut d. 13.36)

Oarjebađaeatnama buohccedikšunbiire lea epidemiija vuođđodásis

Giemas Restauráŋŋa Kukkos ja Corner Innis lea sáhttán dávdaluvvat koronavirusii mannan vahkuloahpa lávvordaga ja sotnabeaivvi gaskasaš ija  

Oarjebađaeatnama buohccedikšunbiirres leat gávnnahuvvon ievttá rájes guokte ođđa koronavirusdáhpáhusa. Dain nubbi lea gávnnahuvvon rádjedestemis čađajohtinmátkkálaččas.  

Dán vahku dáhpáhusaid guorramis lea boahtán ovdan, ahte koronavirusii lea sáhttá dávdaluvvat Giemas restauráŋŋa Kukkos dehe Corner Innis 24.7. lávvordaga ja 25.7. sotnabeaivvi gaskasaš ija gaskaija maŋŋel. Dalle restauráŋŋain guossástallit ávžžuhuvvojit čuovvut iežaset veaju ja ohcalit koronavirusdestii juos dávdamearkkat ilbmudit.  

Negatiivvalaš koronavirusdeasta dávdamearkkaheamis lea dagahan máŋggaid boasttoipmárdusaid  

Njoammuma guorramis leat maŋemus áiggiid boahtán ovdan máŋggat boasttoipmárdusat, mat laktásit dasa go leat mannan dávdamearkkaheapmin koronavirusdestii.

Negatiivvalaš deasta sáhttá earáhuvvat positiivvalažžan juo čuovvovaš beaivve. Juos don leat mannan koronavirusdeasttas ja leat ožžon negatiivvalaš vástádusa ja oaččut infekšuvdnadávdamearkkaid deastta maŋŋelaš beivviid, don galggat dávdamearkkalažžan ohcalit dakkaviđe ođđa koronavirusdestii.

Destii mannama vuorddedettiin, don galggat garvit olmmoškontávttaid ja bissut iešoaivválaš karantenas.

Ovddabealde namuhuvvon ášši orru vajálduvvan ja dávdamearkkalažžan šaddan olmmoš jurddahallá, ahte influeansádávdamearkkat eai sáhte gullat koronai, go deasta lea leamaš negatiivvalaš moadde beaivvi ovdal.

Ovddit negatiivvalaš deasttas ii leat goitge mearkkašupmi iige noahkunárvu, nu ahte juos don leat buohccán ja leat ožžon dávdamearkkaid negatiivvalaš deastta maŋŋel, de dalle galgá mannat ÁLOT ođđa koronavirusdestii.

Oarjebađaeatnama buohccedikšunbiirres gávnnahuvvon koronadáhpáhusat vahkkosaččat

Vahkku 28: 6 dáhpáhusa

Vahkku 29: 25 dáhpáhusa

Vahkku 30 (nohkavaš vahkku): 6 dáhpáhusa (29.7. d. 13.36 rádjái)

Buot buohkanassii Oarjebađaeatnama buohccedikšunbiirre čájánasváldinčuoggáin dahkkojuvvon deasttaid vuođul leat gávnnahuvvon 776 dáhpáhusa.  

Infekšuvnnaid duostunovttadat